හයිබ්‍රිඩ් වාහන පිළිබදව ශ්‍රී ලංකාව තුළ පමණක් නොව ලෝකය පුරාම ජනතාවගේ මෙන්ම රජයන්ගේ ද අවධානය ඉහළ යමින් පවති. එයට ප්‍රධාන හේතුව වන්නේ,වාහනවලින් ඇතිකරන්නාවු පරිසර දුෂණය හයිබ්‍රිඩ් වාහන භාවිතයෙන් අඩුකර ගැනීමට හැකිවීමයි. එයට අමතරව සැලකිය යුතු මට්ටමකින් ඉන්ධන පරිභෝජනය අඩුකර ගැනීමට ද ඉඩ සැලකේ. මේ හේතුන් නිසා මුල් අවධියේ හයිබ්‍රිඩ් වාහන නිෂ්පාදනය කෙරෙහි අවධානයක් යොමු නොකළ ඉහළ ගණයේ වාහන නිෂ්පාදනය කරන සමාගම් පවා හයිබ්‍රිඩ් වාහන නිෂ්පාදනයට අවතීර්ණ වී තිබේ. වාහන හයිබ්‍රිඩ් පද්ධතිවල නිර්මාණයන් දිනෙන් දින වැඩි දියුණු කරමින් ඒවායේ කාර්‍යක්ෂමතාව ඉහළ නැංවීම සදහා වාහන නිෂ්පාදකයින් නිරතුරුව කටයුතු කරමින් සිටිති. එහෙත් එම පද්ධතිවල ක්‍රියාකාරිත්වයේ මූලික සිද්ධාන්ත එලෙසම පවති. හයිබ්‍රිඩ් පද්ධති පිළිබද අවබෝධයක් ලබාගැනීම වාහන කර්මිකයන්ට මෙන්ම,වාහන පිළිබදව උනන්දුවක් දක්වන සෑම කෙනෙකුටම වැදගත්වනු නොඅනුමානය