ලක්දිව උතුරුකරයේ ආර්ය රාජ්‍යයේ ඉතිහාසය වරින්වර විවිධ අන්තගාමී පිරිස් විසින් විකෘති කර තිබීම පිළිබඳව වාර්තා වුව ද, ඒ පිලිබඳ ජනතාව අතර අවධානයක අවම මට්ටමක පැවතිණි. බොහෝ ප්‍රකාශ ඉංග්‍රීසියෙන් පළකර ඇති බැවින් ඒ පිලිබඳ සිංහල පාඨකයාගේ දැනුම අවම යැයි සැලකිය හැකි ය. මේ පිලිබඳ ව දෙස් විදෙස් කිහිපදෙනෙකු විසින් ලෝක බෞද්ධ සම්මේලනයේ උප සභාපති සහ බෞද්ධාලෝක පදනමේ ගරු සභාපති ජගත් සුමතිපාල මහතා වෙත එවැනි අදහස් විකෘති කරන ලද පොත්පත් පවා ඉදිරිපත් කර මේ පිලිබඳ යමක් කළ හැකි දැයි විමසීමේ ප්‍රතිඵලයක් ලෙස මෙම ඓතිහාසික ව වැදගත් ග්‍රන්ථය නිර්මාණය වීමේ පසුබිම සැකසිණි. ඒ අනුව වසර තුනකට වඩා වැඩිකාලයක් තුළ ක්ෂේත්‍ර චාරිකා සහ විෂයානුබද්ධ ලිපි ලේඛන රාශියක් ඇසුරු කර මෙම කෘතිය සම්පාදනය කර ඇත.