සසර සයුරේ වෙරළට ම පැමිණි බෝසත් යළි දියඹට ඇදී ගියේ, “දුක් විඳින අනන්ත අප්‍රමාණ ලෝ සතුන් දුකෙන් මුදවාගෙන, ඔවුන් සමග ම යළි ගොඩට එමි’’ යි යන මහා මෛත්‍රියෙන් පිරුණු අදිටන සහිතව ය. දුක් කම්කටුලු පිරි සාරා සංඛ්‍ය කල්ප ලක්ෂයකට පසු ඒ වීරයාණෝ යළි වෙරළට පීනූහ. ගොඩට පැමිණියහ. සසර දුක ජයගෙන සම්මා සම්බුද්ධත්වයට පත් වූහ. අදිටන් කළ පරිදි කෝටි ප්‍රකෝටි සංඛ්‍යාත ලෝක සත්ත්වයා දුකෙන් මුදවා ගත්හ. මෛත්‍රියේ අදිටන එසේ පල දැරුවේය. සුමේද තවුස් සමයේ සිට පිරිනිවන් පානා මොහොත දක්වා ඒ මෛත්‍රියේ සිහිල් දිය දහරාව ලෝ සතුන් සුවපත් කරමින් ගලා ගිය අයුරු මේ `මෛත්‍රී සාගරයෙන්’ දිස්වෙයි.
